Ghazal

Tuu Ne Dekha Hai Kabhi Aik Nazar Shaam Ke Baad

Tuu Ne Dekha Hai Kabhi Aik Nazar Shaam Ke Baad
Kitne Chup Chaap Se Lagtay Hain Shajar Shaam Ke Baad

Itne Chup Chaap Ke Rastay Bhi Rahain Laa Ilm
Chor Jaain Ge Kisi Roz Nagar Shaam Ke Baad

Maine Aisay Hee Gunaah Teri Judaaeee Mein Kiay
Jesay Toofaan Mein Koi Chor De Ghar Shaam Ke Baad

Raat Beeti To Ginay Aablay Or Phir Socha
Kon Tha Baa-iss-a-Aaghaz-a-Safar Shaam Ke Baad

Tuu Hai Sooraj Tujhay Maaloom Kahaan Raat Ka Dukh
Too Kisi Roz Mairay Ghar Mein Utar Shaam Ke Baad

Loat Aaiy Na Kisi Roz Wo Aawara Mizaaj
Khol Rakhtay Hain Isi Aas Pe Dar Shaam Ke Baad